Maǵan ásirese qatty áser etkeni – aýyl turǵyndaryna degen qamqorlyq boldy. Bizdiń halqymyzdyń 42 paıyzǵa jýyǵy áli de aýyl turǵyndary bolyp esepteledi. Mine, sol halyqty áleýmettik turǵydan qoldaýda aıryqsha qamqorlyq jasalǵaly otyr. Olarǵa jeńildetilgen ósim paıyzymen jylyna 14 myńǵa deıin nesıe beriletin boldy. Búgingi kúngiden bul eki ese kóp. Keminde 40 myńǵa jýyq jańa jumys oryndarynyń ashylýyna múmkindik beredi degen sóz. О́ıtkeni bir otbasynyń qaramaǵynda 3-4 adamy bolady ǵoı. Sóıtip, aýyl turǵyndary qatty serpilip, ózderiniń materıaldyq jaǵdaıyn arttyrýǵa qol jetkizetin bolady. Sonymen qatar meni qatty tánti etken másele – stýdentterdiń jataqhanalarmen qamtylýy boldy. Qazir grantpen oqyp, jataqhanalarda turyp jatqandar negizinen aýyl turǵyndary. Mine, osy talapty jastarǵa qosymsha granttar bólinýimen qatar jańa jataqhanalarmen qamtamasyz etý qarastyrylyp otyr. Ásirese aýylsharýashylyq tehnıkalaryn ıgerýge mamandanatyn jastarǵa aıryqsha qamqorlyq qarastyrylǵan. Sonymen qatar jalaqysy tómen adamdarǵa salyqtyq júktemeni azaıtý bastamasy da halyq arasynda úlken serpilis ákeleri sózsiz. Onyń kólemi burynǵy 10 paıyzdan 1 paıyzǵa deıin túsiriletin boldy.
Menińshe bul bastamalardy halyq úlken qýanyshpen qarsy alyp, qoldaıdy. Elbasy Úndeýi bıylǵy Naýryz merekesi qarsańynda halyqqa aıryqsha tartý boldy dep esepteımin.
Álı BEKTAEV,
Senat depýtaty,
«Aýyl» partııasynyń tóraǵasy
